India e sheh Kosovën akoma si pjesë të Serbisë. Ambasadori i këtij vendi në Beograd, Ajay Swarup thotë se India vazhdon ta përkrahë sovranitetin dhe integritetin territorial të Serbisë.
Për Republikën e Indisë, Kosova vazhdon edhe më tej të konsiderohet si pjesë e shtetit serb.
Kështu ka deklaruar ambasadori i Indisë në Beograd, Ajay Swarup, i cili ka thënë se vendi i tij angazhohet për mbrojtjen e sovranitetit të Serbisë, në të gjitha forumet ndërkombëtare.
“India do të përkrahë Serbinë kur është fjala për mbrojtjen e sovranitetit në të gjitha forumet ndërkombëtare. Qëndrimi ynë është i njohur për vendet tjera, ndërsa pozicioni ynë në marrëdhëniet ndërkombëtare është i tillë që qëndrimi i Indisë respektohet”, ka thënë Swarup.
Ambasadori i Indisë ka rikujtuar se vendi i tij ka përkrahur Rezolutën 1244 dhe se vitin e kaluar në OKB ka përkrahur iniciativën e Serbisë që çështja e legalitetit të pavarësisë të shqyrtohet nga Gjykata Ndërkombëtare e Drejtësisë.
“Qeveria e Indisë konsideron se problemi i Kosovës duhet të zgjidhet me mjete paqësore duke gjetur një zgjidhje të pranueshme nga të dyja palët, me anë të dialogut”.
Ai ka thënë se parimi i vetëvendosjes ka qenë i vlefshëm gjatë periudhës së kolonializmit e jo tash.
